Na-file na ang rape complaint batok sa duha ka lalaki nga ginatudlo naghimulos sa isa ka 20-anyos nga kolehiyala sa isa ka boardinghouse sa La Paz, Iloilo City.
Sa interview sang Bombo Radyo kay Police Major Jose Val Ladublan, hepe sang La Paz Police Station, iya ginpahayag nga 22 anyos kag 23 anyos ang mga lalaki nga ginaalegar naghimo sang pagpanghimulos.
May address man kag pangalan nga gina-uyatan subong ang mga pulis, apang indi maaresto bangud wala pa sang warrant of arrest.
Matandaan nga sandig sa reklamo sang babayi sang Nobyembre 4, sang Nobyembre 1 pa natabo ang ginaalegar nga pagpanghimulos.
Sandig sa reklamo kag sandig sa inisyal nga pagpangusisa, duha ka persona ang gina-alegar naghimo sang pagpanghimulos, kag ginapahayag nga kilala man sang tagreklamo.
Suno pa sa inisyal nga panaysayon sang dalaga sa mga pulis, Nobyembre 1, pagbugtaw niya, wala na siya sang panapton.
Ginapahayag nga nag-inom pa ang dalaga kaupod ang duha ka ginatudlo nga naghimulos sa iya kag ginatul-id man kun may lain nga ginpa-inom sa iya agud nga hungod ini nga madulaan sang pangalibutan.